Tuesday, September 22, 2020

BİR DAHA "SÖZ AZADLIĞI" BƏHANƏSİ İLƏ İSLAMAFOB ADDIM
Son zamanlar Fransada dərc edilən “Charlie Hebdo” adlı bir dərgidə əziz Peyğəmbərimizə (s) qarşı yenidən təhqiredici karikaturalar yayımlanmağa başladı. İslam Peyğəmbərinə (s) qarşı olunan bu hörmətsizlik İslam dünyası və müsəlmanlar tərəfindən hiddətinə səbəb olaraq, şiddətlə qınanılmışdır.
Təəssüflə bu növbəti təxribatçı addımı atmağı qərara alan bir Avropa ölkəsinin dərgisinin “söz azadlığı” bəhanəsi ilə qarşısı alınmır. Onlar hələ də anlamırlar və ya anlamaq istəmirlər ki, milyard yarımdan çox davamçısı olan bir dinin şərəfli müqəddəs şəxsiyyətini təhqir etmək, insanların hisslərini rəncidə etmək tərbiyəsizlik və şərəfsizlikdən başqa bir şey deyildir. Belə addımlar eyni zamanda insanlar arasında barışa və xoş münasibətlərə vurulan kobud məsuliyyətsiz zərbədir.
Biz müsəlmanlıqdan öncə bir insan olaraq aləmlərə rəhmət olan Hz. Məhəmmədə (s) olan sayqısızlığı bütün ilahi peyğəmbərlərə qarşı hörmətsizlik kimi qəbul edir, tərbiyəsizliyə son!.. deyirik. Düşünürük ki, qlobal dünyada sülh və sabitliyə daha çox ehtiyac olduğu halda Avropa ölkələri seyirci qalmamalıdırlar. İnsalnlıq naminə belə islamafob addımın çirkinliyini dərk etməli, təkrarlanmaması üçün lazımi tədbirlər görməlidirlər.

YARDIM VƏ DUALARIMIZI ƏSİRGƏMƏYƏK!
Şəfa verən Allahdan körpəyə şəfa, yardımsevər insanlara əcr diləyirik.

MƏNİ TƏVƏLLÜD GÜNÜM MÜNASİBƏTİ İLƏ TƏBRİK EDƏN HƏR BİR DƏYƏRLİ İNSANA TƏŞƏKKÜR EDİRƏM
Sözümü nadir insanlıq incilərindən olan Həzrət Əlinin (ə) bir kəlamı ilə başlamaq istəyirəm. İmam buyurub: “ÖMRÜNÜN KEÇƏN GÜNLƏRİ KEÇDİ, SABAHI DA MƏLUM DEYİL, BU GÜNÜNÜ YAXŞI ƏMƏLLƏRLƏ QƏNİMƏT BİL!”
Bu gün 40 yaşımı artıq tamamladım. Rahatçılığı, çətinliyi ilə, acılı və şirinli günləri ilə ömrümün 40 payızı artıq arxada qaldı. Təbii ki, bir adəm övladı olaraq ömrümün keçən 480 ayında nə səhvsiz oldum və nə də qüsursuz. Gördüklərim az işlərə qürurlanmadım, əksinə sevinib şükür etsəm də bacarmadıqlarıma və imkanım xaricində olanlara heyfsləndiklərim günlər çox oldu.
“40 yaşında çox şey öyrənib, təcrübə əldə etmək”, “ömrün kamal çağına çatmaq” fikiri doğru imiş.
Öyrəndim ki, hər şeyə əhəmiyyət verməmək, çox da böyütməmək lazım imiş;
İnsanların bağışlamaq, anlamağa çalışmaq və daha güzəştli davranmaq gərək imiş;
Bu ölümlü dünyada diqqətli davranıb kiminsə qəlbini qırmamaq, daha çox könül qazanmağa çalışmaq önəmli imiş;
Allahın fərqli düşünən, müxtəlif zövq və seçimə mənsub bəndələrinə qarşı daha da mehriban, şəfqətli və mərhəmətli olmaq vacib imiş.
Çox özünü müdafiə etməyə enerji sərf etməyib, başqalarının məni düzgün anlamaları üçün səy göstərmədiyim, haqlı tənqidlərdən dərs çıxarıb, təhqir və dedi-qodulara vaxt sərf etmədiyim zamanlar daha dəyərli imiş.
Bir sözlə, ömrün bəlli olmayan sayılı günlərində üzülüb, narahat olmamaq, hər zaman Allaha güvənib, ona arxalanmanın çox faydalı olduğunun daha da fərqinə vardım.
Hər zaman Allahın razılığını əsas tutub çalışmağı, səmimi ağıl və səlim qəlblə doğru və düzgün bildiyin yolda hərəkət etməyin nə qədər qiymətli olduğunu da daha dərindən anladım.
Sonda sizə və özümə duam budur ki:
Bizi yaradan Allah hər birimizə bərəkətli, dəyərli, səmərəli və səadətdolu ömür bəxş etsin. Qalan ömrümüzü Allaha saleh bəndə, vətənə faydalı vətəndaş, insanlığa dəyərli insan kimi yaşamağı nəsib etsin! Amin!


XANIMLARIN İŞTİRAKI İLƏ KƏRBƏLA HADİSƏSİNDƏN BƏHS EDƏN NÖVBƏTİ KONFRANS KEÇİRİLİB

Tbilisidə "Aşura məktəbi və Kərbəla dərsi" mövzusunda konfransın ikinci hissəsi keçirilib. Bu konfransda müxtəlif yerlərdən yalnız xanımlar iştirak edib.

Quran tilavəti ilə açıq elan olunan konfransda Gürcüstan Müsəlman Qadınlar İcmasının üzvlərinin söhbətləri olub. Sonra böyük ekranda Azərbaycan, İran İR, Türkiyə və Rusiyadan konfransa qatılan dəyərli din alimlərinin çıxışları təqdim olunub.

Çıxış edənlər ümumbəşəri və bütün zamanları əhatə edən İmam Hüseynin (ə) qiyamı, onun Kərbəla hərəkatı, Aşura məktəbindən alınan dərslər və azadlıq və mənəviyyat uğrunda fədakarlıq mövzusunda məlumat veriblər.

Konfransda Kərbəla hadisəsinin qısa tarixindən bəhs edən videoçarxla bərabər İmam Hüseynin (ə) matəmi ilə əlaqədar dünya ölkələrində keçirilən yürüş və tədbirlərdən nümunələr nümayiş etdirilib.

Sonda iştirakçılara İmam Hüseynin (ə) Kərbəla qiyamından bəhs edən və başqa dini kitablar hədiyyə olunub.


DİNİ BİLİKLƏR ÜZRƏ SINAQ İMTAHANINDA 100 SEÇKİN ŞAGİRD İŞTİRAK EDİB

Bu gün Tbilisi Cümə məscidinin kitabxanasında və Marneulidə yerləşən Hz. İmam Hüseyn (ə) adına məsciddə din kurslarında oxuyan tələbələr arasında öncədən elan olunan Ümumi Dini Biliklərdən sınaq imtahanı təşkil olunub.

Test və yazılı üslubda keçirilən sınaq imtahanında Gürcüstanın müxtəlif yerlərindən 100-ə yaxın seçkin tələbə suallara cavab verməklə dini bilgilərini sınayıblar.

Yaxında imtahandan yüksək balla üstünlük qazananlar Gürcüstan Müsəlmanları İdarəsi tərəfindən nəfis hədiyyələrlə mukafatlandırılacaqlar.


TBİLİSİDƏ MƏHƏRRƏMLİK MƏRASİMLƏRİ KEÇİRİLİB

Hər il Gürcüstanın bir çox şəhər və kəndlərində olduğu kimi paytaxt Tbilisidə yerləşən Cümə məscidində (və şəhərin digər səkkiz yerində) 10 günlük Məhərrəmlik mərasimləri Hüseynsevər müsəlmanların iştirakı ilə izdihamlı şəkildə keçirildi. Məhərrəm ayının əvvəlindən etibarən axşam namazından sonra təşkil olunan mərasimlərdə Quran və dualar oxundu, söhbətlər edildi, mərsiyələr oxundu ehsanlar verildi.

Gürcüstan Müsəlmanları İdarəsi İmam Hüseynin (ə) Kərbəla qiyamını xatırladan və dinimizi öyrənməyə şərait yaradan belə məclislərinin təşkilində hər növ zəhmət çəkənlərə Allahdan əcr diləyir, dua və Ehsanların ali dərəcədə qəbul olunmasını istəyir. Allah bütün Hüseynsevərlərə və Onun yolunu gedənlərə Həzrətin bu dünyada ziyarətini və axirətdə isə şəfaətini nəsib etsin. Amin!.


TBİLİSİDƏ “AŞURA MƏKTƏBİ VƏ KƏRBƏLA DƏRSİ” MÖVZUSUNDA KONFRANS KEÇİRİLİB

Dünən (28 avqust) Tbilisidə yerləşən “Alulbeyt” adına Dini Mədəniyyət Mərkəzində "Aşura məktəbi və Kərbəla dərsi" mövzusunda konfrans keçirilib. Konfransda din, ictimaiyyət xadimləri, ziyalılar və tələbələr iştirak edib.

Tədbir Vidadi Qurbanovun Quran-Kərimdən ayələrin tilavəti ilə başlayıb.

Sonra Kərbəla hadisəsinin qısa tarixindən bəhs edən videoçarx nümayiş olunub.

Daha sonra konfransın moderatoru Kamran Məmmədov konfransın məqsəd və məramını izah edib, sözü Gürcüstan Müsəlmanları İdarəsinin Şeyxi Hacı Ramin İgidova verib.

O, Kərbəla vaqiəsinin digər faciələrdən fərqinə toxunaraq, onun günümüzədək yaşamasına səbəb olan özəlliklərdən danışıb. Konfransda iştirak edən Gürcüstan Müsəlmanlar İdarəsinin Şərqi Gürcüstan üzrə müftisi Hacı Yasin Əliyev konfrans iştirakçılarını salamlayaraq qısa İmam Hüseynin (ə) şəxsiyyəti haqda məlumat verib.

Sonra böyük ekranda Azərbaycan, İran İR, Türkiyə və Almaniyadan konfransa qatılan dəyərli din alimlərinin çıxışları təqdim olunub. Höccətülislam Seyid Əli Əkbər Ocaqnecat, Hacı Kadir Akaras, Hacı Əhliman Rüstəmov, Hacı Kərim Ucar və Hacı Davud Zarenin söhbətləri olub.

Çıxış edənlər ümumbəşəri və bütün zamanları əhatə edən İmam Hüseynin (ə) qiyamı, onun Kərbəla hərəkatı, Aşura məktəbindən alınan dərslər və azadlıq və mənəviyyat uğrunda fədakarlıq mövzusunda məlumat veriblər.

Konfransda İmam Hüseynin (ə) matəmi ilə əlaqədar dünya ölkələrində keçirilən yürüş və tədbirlərdən video çarx nümayiş etdirilib.

Sonda İmam Hüseyn (ə) ehsanı süfrəsi təqdim olunub.


BAŞ SAĞLIĞI

Published in YAZILAR Avqust 25 2020

BAŞ SAĞLIĞI

Duşetinin Şatili magistralında baş vermiş faciə ilə əlaqədar həmvətənlilərimizə və qəzada həlak olanların ailəsinə dərin hüznlə başsağlığı veririk. Yaralananlara və xəsarət alanlara isə şəfa diləyirik.

Qeyd edək ki, ötən gün baş vermiş həmin qəzada 17 nəfər dünyasını dəyişmiş, 3 nəfər isə ağır yaralanmışdır.

25 avqust ölkədə matəm günü elan olunub.


BAŞLAYIR QƏMLİ MƏHƏRRƏM GÜNLƏRİ

Həzrət Məhəmməd Peyğəmbərin (s) əziz nəvəsi İmam Hüseynin (ə) Kərbəla vaqiəsindəki məram və məqsədinin yaşadılmasının və Aşuranın mahiyyətini olduğu kimi bəşəriyyətə çatdırmaq məqsədi ilə mərasimlər təşkil etmənin, məzlumun yanında olub zülmə qarşı həmrəylik nümayiş etdirərək bir araya toplanmanın çox böyük əhəmiyyəti var.

Dinimizin yaşaması uğrunda canından və doğmalarından keçən İmam Hüseynin (ə) Kərbəla həqiqətləri, əgər xürafatdan uzaq şəkildə dünyaya çatdırılarsa, növbəti "aşura"lar yaşanmaz, günahsız insanlar qurban getməz, "Kərbəla"lar (qətliamlar) təkrarlanmaz, insanlıq da ölməzdi:

"Məhərrəmlik mərasimləri o zamana qədər davam edəcək ki, bəşəriyyət və xüsusi ilə müsəlmanlar İmam Hüseynin (ə) məktəbindən dərs alıb, ibrət götürəcək, Hüseynin (ə) yolunda fəda olduğu dini həyatlarında yaşayacaqlar, həmçinin dünyada sülh, barış, haqq və ədalət hökm sürəcək, batil haqqa məğlub olacaq, zalımlər zülmlərindən əl çəkəcəklər, günahsız insanlara qarşı terror edilməyəcək, özünü insan hesab edən hər bir şəxs din qardaşına və hər hansı adəm övladına amansız olmayacaq, qətllər törətməyəcəkdir.

Tam əmin olaraq İnanırıq ki, zəmanənin sahibi olan Həzrət Mehdi (ə) zühur edərək zülmlə dolmuş dünyanı ədalətlə gülüstan edəcək, yer üzündə haqqı bərpa edəcəkdir.


TBİLİSİDƏ QƏDİR-XUM BAYRAMI QEYD OLUNUB
Bu günlər Gürcüstanın bir çox rayon və kəndlərdə, məscidlərdə Həzrət İmam Əlinin (ə) imamət məqamına təyin olunduğu gün "Qədir-xum" bayramı ilə əlaqədar mərasimlər təşkil olunur, tədbirlər keçirilir və bayram süfrələri açılır.
Həmin tədbirlərdən biri də bu axşam Tbilisinin Poniçala (Soğanlıq) qəsəbəsində yerli və ətraf məntəqələrdən dəvət olunan inanclı müsəlmanların iştirakı ilə təşkil olunub.
Quran tilavəti ilə açıq elan olunan mərasimdə ruhani xətiblər “Qədir-xum” bayramının mənası, tarixi həqiqəti, əhəmiyyəti və önəmindən danışıb, Peyğəmbərimizin (s) son sifariş və vəsiyyətini müsəlmanlara xatırladıblar.
“Əhlibeyt” məscidinin həyətində təşkil olunan bu tədbirdə şeir, mövludnamə və ilahilər səsləndirilib. Azərbaycan, İran və Türkiyədən dəyərli din alimlərinin görüntülü söhbəti təqdim olunub.
Sonda tədbirdə iştirak edən azyaşlı uşaqlara hədiyyələr təqdim olunub.

1 -dən səhifə 30